#英國生活 #WEEKLY REVIEW
英國日常生活｜Weekly Review July #1
搵樓近況 ｜移英兩年，物質欲望改變
目錄：
1. 搵樓近況
2. 移英兩年，物質欲望改變不知不覺已經嚟七月尾，本來想每星期出一篇週記，最後變咗兩個月先得閒開電腦紀錄吓生活近況。
搵樓近況
之前喺《英國日常生活｜每週回顧 Weekly Review April #2》提及過睇中一間 Semi-detached 出 Offer 失敗，隔咗兩個月，最近 Agent 打嚟講間屋會重新上架，問我仲有無興趣出 Offer，我同乜生商量後覺得間屋有啲奇怪，決定唔出 Offer。
呢兩個月每朝起身第一時間喺打開電腦上 Rightmove 同 Zoopla 睇吓有無新盤，唔知喺咪因為銀行同按揭利率不停加息嘅關係，由六月中開始每日都唔喺好多業主放盤，甚至試過有一星期都無新盤，只喺見到有啲舊盤減價。就算喺 Rightmove 同 Zoopla 見到有盤想約 Agent 睇樓，Agent 突然講業主唔再放賣，介紹我哋睇其他盤。乜生話有機會因為按揭利率加息搞到業主想樓換樓嘅成本多咗，所以好多業主都收返啲盤唔賣，睇定啲樓市先再決定賣唔賣層樓。
近排喺 Google Chrome 加咗一個叫 Property Log Extension，每次用 Google Chrome 瀏覽 Rightmove 或 Zoopla ，會顯示返個樓盤樓價有無減價，最近見到好多盤都減價，而且好多業主都減價幾次，睇嚟銀行加息影響樓價都幾大。
移英兩年，物質欲望改變
最近回顧喺英國生活兩年，一開始喺英國中部落地，識到一班朋友，平時大家交流吓喺英國生活嘅野，好多時都會一齊傾吓買咩護膚品名牌等等。英國有時遇上大特價時真喺好抵，朋友買護膚品嘅數量多到放唔曬一間房。為咗埋堆同跟風之吓買咗一堆名貴護膚品、香水，隔咗段時間發現啲野根本唔適合自己，浪費咗啲錢，自己又唔開心。
隔咗一段時間，突然有一日醒覺，覺得家人健康好重要，自自然然花多咗時間留意健康飲食，睇多咗 Youtube 學煮飯（ 推介梁芷靈 / 通之廚房 / Kit Mak Youtuber ），得閒同朋友切磋廚藝，學吓懶人料理，簡簡單單煮一餐，乜生食得開心，自己心滿意足，原來快樂就喺咁簡單。
無論大家身處何方，記得飲多啲水，食多啲健康食物，長命啲等睇結局嘛。
如果你喜歡我的內容…
歡迎拍拍手，你嘅 Follow 追蹤會喺我寫落去嘅動力！
